Latgaliešu folklora


Ekspedīcijas
Foto galerija
Videotēka
Teiceju reģistrs
Vācēju reģistrs
Šifra atslēga
Publikācijas
Pētniecība
Folkloras žanri

 




Dziesmu folklora - Baznīcas dziesmas
03-T4-V3-Db8
O, kai daudz dīnu nanūžaluotu,
Bez lobu dorbu izgaisynuotu.
Radzu biedeigu dzeivi ļauneigu,
Grākūs nūsleicynuotu.

Pasamūst dreižuok, muna dvēsele,
Uz čīši naloba jau esi ceļa.
Guodoj ap sevim, slykts byus deļ teve,
Kod smierts dzeivi dreiž atjims.

Par ļauneibu tovu eļne jau gaida,
Jims muužeiga mūka vysaida.
Kai vari pacīst, žālumā naīkrist,
Kod ap tū dzīdim tagad.

O, kaida muna sirds esi troka,
Un par akmini tyki cītuoka.
Kod nažālovi un naraudovi,
Par bezdīveibu sovu.

Nūst, nūst nu mane ļauna draudzeiba,
Nalobu dorbu lai gaist cereiba.
Dīvu vīn mīļuot un jū gūdynuot,
Gribim tagad un myužam Amen.
(Bērzgale 2013)
03-T4-V3-Db7
Slaukit osoras

Slaukit osorys nu vaigu,
Tuoli skumis aizdzenit.
Krystticeigī bolsim jaukim
Prīka dzīsmis dzīduojit.
Gon nu kopa augšan ceļas
Jezus Kristus sovā mīsā.

Aleļuja, aleļuja,
Lai nu skan aleļuja.
(Bērzgale 2013)
03-T4-V3-Db6
Adventa dzīsme

Nu Raja, skaista mīsta,
Izdzeita ir(a) sīvīte.

Deļ uobeļa iesšonys,
Caur ļauna dareišonu.

Ej, Īv, nu Raja uorā,
Deļtuo ka nalobu dori.

Dreiži ej, Odum, ir tu,
Pamazdams skaistu vītu.

Izguojis Odums nu Raja,
Stuojuos iz zemis klajuos.

Tūlaik pruots jam daguoja,
Kod tam laiks jau puorguoja.

Īkš Raja i vyss beja,
Tī nikuo naturēja.

Pūstu zemi struoduoja,
I rauduodams runova.

Ak, cīš gryuts maņ, biedeigam,
Cylvākam nalaimeigam.

Iz Raju tikt navaru,
Grāks dora ceļu garu.

Īkš Raja laimeigs beju,
Zalta vuorpys redzieju.

Tī orkla naturieju,
Dzeit zyrga namuocieju.

Ka byutu loba sīva,
Klauseitu vuorda Dīva.

Beitumēs runuošonys,
Ļauna kārdynuošonys.

I es pats ļauneigs byudams,
Kod viļteibā ticādams.

Nagribieju tevi pamest,
Pajiemu uobuli ēst.

Tu deļ ļauna viļteibys,
Es deļ tovys mīleibys.

Cīssim tagad navaļu,
Īkš šom ļauneibom daļu.

Īkš suopu dzymdynuosim,
I īkš bādu staiguosim.

A es zemi struoduošu
I ap maizi guoduošu.

O ļaunu nagūdeigi,
Ka tik esi ļauneigu.

Pīvyldams pyrmū Īvu,
Naļuovi vysom sīvom.

Jau vyss izapiļdejuos,
Sludynuošona stuojās.

Davida Izajaša,
Kod muote Mesijaša.

Nu Betleju bāgdama,
Iz iezeļa juodama.

Gribēja laimi dareit,
Mums ar Dīvu sadareit.

Iz Tev` lelu gūdeibu,
Īt iz svešu ciļteibu.

Marija ar Jezupu
I mes ar jū kūpā.

Oduma meitys dāls,
Kas mozs tai i lels.

Vysi kreitam iz ceļu,
Dūdam tev Jezu lelu.

Gūdu i klaineišonu
Nu sirds visys teikšonu.
(Bērzgale 2013)
03-T4-V3-Db5
Un kod šai dzeivē mums gaitys beigsīs, Lyudz, lai mums Jezus debesis atver,
Kur mes tod, Anna, ar vysim eņgelim,
Dzīduosim myužam, aizlyudz par mums.

Tī, kas škeistej sovys gunis,
Nu kas cīš par dzeivis vainem, Marija.
Rauduos sleikst bez miteišonys,
Tovys lyudz apsažāluošonys, Marija.

Straume grāku mozguotajā,
Vysys suopis remdeituoja, Marija.
Esi kluotu pi mierstūšim,
Nu remdēsi guni cītušim, Marija.

Nūmyruši gunīs mūkuos
Stīp uz Tevim sovys rūkys, Marija.
Muote, vaigu vinim ruodi,
Dīva prīškā dreiž jūs stuodi, Marija.

O, Dabasu atsliedzēja,
Dvēselis mūkuos cītēja, Marija.
Gryb caur Tovu aizbiļsteibu,
Īmontuot myužam laimeibu, Marija.

Taisneiga apskaidruotuoja,
Grēcinīku prīcuotuoja, Marija.
Lai caur Tovu aizbiļsteibu,
Myruši bauda dusiešonu, Marija.

Ar Tovim lelim nūpalnim,
Nūdzāsuši suopis par grākim, Marija.
Lai dvēselis nu timseibu,
Īt uz dabasu vaļsteibu, Marija.
(Bērzgale 2013)
03-T4-V3-Db3
Fatimys Dīvamuotis Ave

Reiz treispadsmitajā majā,
Kovā da Irijā,
Kai Jaunova skaista
Tu nuoci, Marija.
Ave, Ave, Ave Marija!
Ave, Ave, Ave Marija!

Ar gaismu viers kūka
Ik mienesi nuoci.
Ik dīnys Rūžkrūni
Mums lyugtīs Tu muoci.
Ave, Ave, Ave Marija!
Ave, Ave, Ave Marija!

Tu sūleji mīru
Viers zemis, Marija.
Ka atmatam grāku
I mes gondarejom.
Ave, Ave, Ave Marija!
Ave, Ave, Ave Marija!

Tu saulē oktobrī,
Pi debess rūtuoji,
Ar breinumu sovu
Myus puorlīcynuoji.
Ave, Ave, Ave Marija!
Ave, Ave, Ave Marija!

Reiz Sirds Bezvaineiguo
Šū pasauli vaļdeis.
Tiks uzvarāts ļaunums,
Byus mīrs vysuos vaļstīs.
Ave, Ave, Ave Marija!
Ave, Ave, Ave Marija!
(Bērzgale 2013)
03-T4-V3-Db2
Vyssvātuo Muote, pi tevys steidzamēs

Vyssvātuo Muote, pi teve steidzamēs,
Kam zūbi suopeigi sirds cauri dūr,
Saucam mes vysi bāduos, osoruos,
Aizastuovi myus, aizlyudz par mums.

Kur tagad, Muote, lai ejam mes,
I kur mes mīru lai sev meklejam.
Sovejūs bārnu lyugšonu klausi,
Aizstuovi myus, aizlyudz par mums.

Tovs vuords, Marija, ir(a) myužam slaveits.
Tu myusu paleigs gryutajā breidī,
Kod myusu suopu krūnis spūžs golvā.
Aizastuovi myus(us), aizlyudz par mums.

Nu vysu pušu pi Tevis, Muote,
Steidz sovu suopu nūspīsta tauta.
Snīdz Jei mums vysim sirds žielesteibu.
Aizastuovi myus, aizlyudz par mums.

Ai, Myusu Muote, Vysmīleiguo Muote,
Ļauņ baudeit Tovys sirds mīlesteibu.
Palīkam vuoji, kod asam vīni.
Aizastuovi myus, aizlyudz par mums.

Tu slymus uorsti myusu naspākā.
Kvālūšuos suopēs paleigā saucam,
Jo asam kluoti ar grāku rātom.
Aizastuovi myus, aizlyudz par mums.

Kod osorys pādejuos nu ocu ritēs,
Tod, Svātā Muote, tu tamā stuņdē
Aizdar myusu acs ar sovu rūkom.
Aizastuovi myus, aizlyudz par mums.
(Bērzgale 2013)
03-T4-V3-Db1
Marija, raug, Tev vīnai,
Mes sovu sirdi veļtejam.
Dūd mums byut skaidram zaltam,
Snīdz sovu sirdi mums!

Snīdz sirdi, kas kai Tova,
Dag debess gaismā spūžā.
Kai lileja, lai kūšuo,
Tai svaigā myrdzā plaukstā.

Snīdz sirdi, kas kai saule
Ik reitus laipni mirdz.
Ar nabogim, kas sāroj,
Kai maigā rosā reits.
(Bērzgale 2013)
05-T15-V3-Db11
Plyuc zīdus skaistuokūs. ( Staņslava Vingra pašsacerētā dziesma, psalms. Norakstīta no viņa klades, iedziedāta kasetē. )

Plyuc zīdus skaistuokūs un muotei (tāvam) nes.
Šaļc smuordu vejūlis i lilejis;
Pi klusuo oltora, kur Krystus uzvara,
Par muotes (tāva) mīleibu teic Dīva tu.

Glaud muotis (tāva) rūkys tu ar meileibys vaiņuku,
Lai mirdz tur meileibā lykts, Tovs boltais zīds.
Kas muoti (tāvu) gūdynuos, tys Dīvu līcynuos,
Tur vaļdēs Krystus gors kai saulis stors.

Plyuc zīdus skaistuokūs un muotei (tāvam) nes,
Šaļc smuordu vejūlis i lilejis.
Lyudz Dīva muoti tu, par muotes (tāva) dvēseli,
Lai debess vaļsteibu jei montuotu.
(Vabole 2013)
05-T15-V3-Db10
Apsažāloj par mani, o Dīvs,
Deļ lelys žielesteibys Tovys.
O, leidz daudzumam meilys sirsneibys dzeivē Tovā.
Teirej nataisneibu munu,
Jū es atzeistu munu puori kuopšonu.
I grāks muns ir(a) vīnaids munā prīškā,
Tev vīnam asmu grākojis i ļaunu prīškā Tovom acim i darejis,
Kab Tu taisneigs palyktu īkš vuorda Tova
I kas pret Tevi runuoj.

Raugi, es esmu nūzīgumam pījimts,
I iz grākim ījāmuse mani Muote muna.
Raugi, Tev pasaceit sirds patīseiba,
Nazynomys i paslapys lītys gudreibys Tovys apsludynuojis man esi.
Aplaisti mani ar kizuopu i kristeits topšu,
Apmozgoj mani, i es par snīgu boltuoks tikšu.
Līdz man prīcu, leiksmeibu – dzierdi,
I līksmuosīs kauli muni.
Pagrīz Tovu nu grākim munim,
I vysys nataisneibys munys teirej.
Radeij`s mani Dīvs teiru sirdi i atjaunuoj munu goru Tovu svātu,
Naatmet mani nūst nu Tova vaiga
I naatjem Tovu svātū goru nu manis,
Atdūt man prīcu Tovys pesteišonys
I ar goru lobpruoteigi īstiprynoj mani.
Es muoceišu puorkuopiejus Tovu ceļu
I bezdīveibys Tevim esu grīzīs.
Gluob mani nu ašņa, Dīvs o, Dīvs!
Munys peistešonys i muna mēle vielejās Tovu taisneibu.
Atdori o, Kungs, munys lyupys,
I muna mute izsaceis Tovu teicamu gūdu,
Jū ka Dīvs grybātu upuriešonys,
Es tev dūtu, a upuriešonys kotrys dadzynoj ļauds jau ir(a) nūkuortuojs.
(Vabole 2013)
05-T7-V2-Db9
DZĪSME VYSSV. J. MARIJAS GŪDAM

Jaunova Svātuo Aglynys bazneicā
Ar sovu spāku dori daudz mums prīcys:
Ļaudis līcynoj, ka latvīšu molai
Daudz žielesteibu duovuoji bez gola.

Jī steidz pi Teve ar stypru cereibu,
Paleigu Tovu lyudz ar mīlesteibu,
I vysā dzeivē dori jūs laimeigus.

Slimeibā grytā, kas ir paguldynuots
Cereibys tykums ir nūvuojinuots
I sovu Dālu duovynoj par bruoli.

Muotis nas bārnus, lai tu viņus sorgoj,
Kod jī cīš suopis, slimeibys i vuorgus.
Caur Tovys svātuos globšonys paleigu
Juos atrūn bārnus vasalus, prīceigus.

Na vīns viņ sleikdams dziļumā iudiņa,
Kod Tevi sauce, beja gluobts nu viņa.
Kod gunī daga ļaužu muojis, sādžys,
Nūvērsi pūstu, mozynuoji bādys.

Kod myus apjēme slimeibys i sārgys
Cylvāki daudzi myra sovuos sātuos,
Tu, lobuo Muote, gluobi myus žēleigi
Caur Tovu spāku esam mes laimeigi.

Lai apspīšona, vysaidys nalaimis
Ir tuoli prūm nu kristticeigūs saimis.
Kod Tu, Jaunova, byusi mums žieleiga,
Tod slavēs Tevi myusu sirds prīceiga.

Mameņa mysu, kreitam mes pret Tevi
Pasargoj, lyudzam, vysod sauc pi seve.
Esi mums brunis vysūs dzeives vuorgūs
I pasnīdz rūku myusim laikūs borgūs.

Ļaudis pi Teve steidz pateiceibu
I Tovu gūdu teic ar mīlesteibu.
Ļaun, Dīva Muote, Tevi slavēt, cīneit,
Jo vysod gribim Tevi korsti mīļuot.
(Vabole 2013)
05–T20–V5-Db8
Gūds Marijai
Gūds Marijai, gūds, slave svātai Muotei gūds,
Dzīdi jauki, meilais katuoļ, gūdu jei dūd,
Dzīdi jauki, meilais katuoļ, Mariju tu teic,
Dzīdi jauki, meilais katuoļ, Mariju tu teic.
Juos rūkys jū auklēja, kas šū pasauli
Radēja i izpesteja, Juos Dāls un tovs bruoļs
Dzīdi jauki meilais katuoļ, utt.
Meili bārni jo jius gribit svātu dzeivi vest,
Leidz kai Jezus Marijai jius gūdu steidzit nest.
Dzīdi jauki meilais katuoļ, utt.
Navaineiba, svātums, ceistums, Tys Marijis gūds,
Caur tū meiluo debess Kundze paleiga dūs daudz.
Dzīdi jauki, meilais katuoļs, utt.
Augšuok par eņgelim caltu, krūnej pats Dīvs Jū,
Meilais katuoļs, vysuos vītuos cīnej Mariju.
Dzīdi jauki, meilais katuoļ, u.t.t.
Marijas vuordu ar gūdu vysod slavinoj
Jū kai visluobuokū Muoti korsti gūdinoj
Dzīdi jauki meilais katūļs, utt.
I kod vajadzēs tev škiertīs ar šū pasauli,
Juos rūkuos drūši atdūt sovu dvēseli.
Dzīdi jauki, meilais katuoļ, utt.
Tod myužeigi debess gūdā Jū redzēs`,
Kur ar Viņu reizē Dīvu slavēt variesi.
Dzīdi jauki, meilais katuoļ, utt., Mariju tu teic.
(no klades)
(Vabole 2013)
05–T20–V5-Db7
Jezu Krista

Jezu Krista, prosam tevi
Kab nūjimtu sūdu munu. Marija, Marija.

Uz debesim taisnu ceļu
Lyudzam, Jezu, pazemeigi. Marija, Marija.

Ryugta mūka, gryuta novembrī,
Kod pi smiertis stuņde muna. Marija, Marija

Ryugta beja nūmieršona,
Bet soldona dzeivuošona. Marija, Marija.

Mes prīceigi i ļusteigi,
Kod Marija ar mums guoja. Marija, Marija

Kod Marija ar mums guoja,
Sovu Kristu leidzi nese. Marija, Marija.
(3 reizes itu dzīd) (no klades)
(Vabole 2013)
05–T20–V5-Db6
Latvijas katuoļu himna

Ved myus pi Dīva, o Marija,
Bez Juo mes dzeivuot navarim.
Jo Dīvu mīļuot vysod beja
Sirds prīks un laime cylvākam.
Tuo lyudzam, svātou Muote,
Nu vysys dvēselis,
Tu debeseiga Majestate,
Tu jaukums vysa pasauļa,
Ved Tu pi Dīva myusu saimis,
Soldynoj ryugtus liktiņus,
Styprynoj bārnus, tāvus, muotis
Prīcynoj skumus, vuorguļus.
Tuo lyudzam....

Ved Tu pi Dīva sabīdreibu,
Taisneigus pador lykumus,
Apgaismoj presi, školu, tīsu,
Ticeigus dūt mums vaļdnīkus
Tuo lyudzam....

Ved myus pi Dīva kotrā breidī,
Līksmeibas dīnuos, nalaimēs,
Kod bādys, suopis guļ mums sirdī,
Kod vaigi sleikst mums osoruos.
Tuo lyudzam...

Ved myus pi Dīva, Tovus bārnus,
Tu myusu zemis Gluobieja.
Panuoc ka naītu ceļus ļaunus
Tevis mes lyudzam, Marija.
To lyudzam....
(no klades)
(Vabole 2013)
05–T20–V5-Db5
Vasala, Jiurys zvaigzne

Vasala, Jiurys zvaigzne,
Teira Dīva Muote,
Vysod teira spūdri
Debess laimis vuorti.

Jimdama Tu vasala
Nu engeļa mutis,
Dūd soldonu mīru,
Atmej Īvys vuordu.

Nūjem grāka saišķus,
Oklim atdūt acs;
Nu mums atdzeņ ļaunu,
Ved iz vysu lobu.

Ruodīs mums kai Muote,
Lai tev aizastuojūt,
Mums vysod klausa,
Kurs nu Teve dzyma.

Bezvaineiga, teira,
Vysod ruoma, klusej,
Myusu grāka klusa,
Ruomas der i klausas.

Svātai dzeivei muocej,
Drūšu ceļu ruodi,
Myužam prīcu baudeit

Tāvam i Juo Dālam,
Arī Svātam Goram,
Trejim gūds ar slavi
Tagad i myužeigi.
(no klades)
(Vabole 2013)
05–T20–V5-Db4
Sveika, Marija

Sveika, Marija Tu Jaunova, uz Tevim mēs steidzam,
Še, viers zemis, mes izdzeiti paleigā Teve saucam.
O, Marija, paleidzi mums, Tu myusu cereiba,
Paleidzi mums, O Marija, paleidzi mums i vysim.
O, Marija, paleidzi mums, o, Marija, paleidzi mums.
Paleidzi mums, o, Marija, slavynuosim Tevi.
Izlyudz, Marija, mums nu Dāla eistū žielesteibu.
Teiruos rūkys ceļ uz Viņu, lyudzam ar mīleibu,
O, Marija, paleidzi mums......
Myusu Muote, naaizmierst bārnu, kuri Tevi teicam,
Aizastuoj par mums pi Dīva, korsti Tevi lyudzam.
O, Marija, paleidzi mums....
Nūslauk osorys nu vaiga, žāloj sirds cārtumus.
O, Marija, paleidz mums....
Visuteiruokā Jaunova myusu, remdej suopis.
Lyudz Tu Jezus, lyudz par myusim, atgrīz myus nu struopis.
O, Marija, paleidzi mums....
Uzticeigi Tev kolpuosim, Tevi slavynuosim,
I piec debesīs ar Tevi vysod kūpā byusim.
O, Marija, paleidzi mums....
Vissvareigū Kungu Dīvu slavēsim prīceigi,
Dzīduodami jaukys dzīsmis par myužim skaneigys
O, Marija, paleidzi mums.... (no klades)
(Vabole 2013)
05–T20–V5-Db3
Vissvātuoka Marija

Vissvātuoka Marija, teira Jaunova,
Pisastuoj Tu par mums pi Sova Dāla.
Marija, paleidzi mums Kungu Jezu mīļot (2x)

Kas nu laužu tevi atrass, pasmeļs
I kas Tevi korsti mīļos, izbeigs viļteibu.
Marija, paleidzi mums uzvarēt viļteibu! (2r)

Kuru Marija mīļoj, tū i Kungs Dīvs mīļoj,
Engeļu puļki vysod nu ļaunumu sorgoj.
Mīļoj i sorgoj myus, Vissvātuo Marija, (2r)

Nalaimeigi Īvys bārni osoru līknē,
Tevis saucam, o Marija, atei paleigā.
Aizastuoj, aizastuoj žēleiga Jaunova (2r)

Mes bez tovys žielesteibys grākūs īkrissim
I tod Dīvu aizdusmosim eļnē pazussim.
Marija, paleidzi mums sorguotīs nu grāka, (2r)

Ar Tovu vuordu teik eļnis spāki satrīkti
I caur tovu lyugšonu grāki pīdūti.
Tu atej, Marija, paleigā mums vysim (2r)

Tu korsti puor vysu dzeivi Dīvu mīļoj,
Debesīs vysauksta gūda caur Tū dabovi.
Marija, paleidzi mums Kungu Jezu mīļot, (2r)

Napīlaid tod o, Marija, ka mes grākotu,
Tova Dāla duorgū asni kuojom meideitu.
Marija, paleidzi mums Kungu Jezu mīļot, (2r)

Izlyudz mums deļ Kunga Jezu korstu mīleibu,
Lai pēc Jezus vysod sluopstom mes ar līksmeibu.
Marija, paleidzi mums Kungu Jezu mīļuot!

Mīļuodami Kungu Jezu byusim laimeigi,
Aizpeļneisim debesīs prīcu myužeigi.
Marija, paleidzi mums Kungu Jezu mīļot.

Kur ar Mariju, eņgelim Dīvu slavēsim,
Gūdu svātai Trejadeibai jauki dzīduosim
Marija, paleidzi mums Kungu Jezu mīļot! (2r)
(no klades)
(Vabole 2013)
05–T20–V5-Db2
Īsim mīleigi

Īsim mīleigi mes vysi
Iz Marijis muotis sirdi.
Kod mums apspīž bādys, skumis,
Myusu lylu grāku vainis.

Īsim vysi ar lyugšonom
I ar žāluma osorom.
Tei sirds saprass myusu suopis
I atgrīzs jei nūst mums struopis.

Jei storp meitom Oduma,
Sirds Jai pylna ir lobuma;
Kotrā breidī meklej tevis
I mileigi sauc pi sevis.

Pi manis šur, bārni ,ejit,
Munys žielestībys smelit,
Atrass mani, laimi pasmeļs,
Dāls tam žielesteibys īdūs.

Kaidus cīte cārtumus,
I Dāls mūkys gryutumus,
Kod zam krysta Jei stuovēja
I vysas mūkys redzēje.

Kod Jezus iz krysta myra
Sirds Jei dziļuos suopēs gryma.
Kod Dāls atdūd sovu dzeivi,
Cylvāks tik par tovu vaini.

Tei Marijas sirdei slave,
Ka mums pesteišonu deve.
Caur Juos vysteiruoku mīsu,
Ka guoja Dīvs pesteit vysu.

Jei sirdis Jezu nosuoja,
Sovā klēpī jū auklēje,
Audzēja, ka Dāls Dīva
Byutu mums svāta mīra.

Kod Jezus ar sovu Asni
Atmoksuoja Tāvam dusmi,
I Jei reizē sirdi lyka,
Tai par Muoti ļaudim tyka.

Nu krysta par muoti myusim
Jū Jezus atdūd vysim.
Tod par juos bārnim byusim,
Jo korsti viņu mīļosim.

Īsim visi kai pi motis,
Kod mums apspīž bādys suopis,
Muote, nūceļ myusu skumis,
Izpeļneituos grāku struopis

Muote, mes mīļojam Tevi,
Vysod dzīžom tovu slavi.
Kab debess prīcā līksmeigi
Kūpā mes byutu myužeigi.
(no klades)
(Vabole 2013)
05–T20–V5-Db1
Par kolnim, lejom.

Par kolnim, lejom zvons bolsu trauc,
Iz Dīva lyugšonu ticeigūs sauc.
Slavej, slavej, slavej Mariju (2 r)
Pa šauru stidzeņu, kur kolni beidzās,
Iz Svātu Jaunovu meitine steidzās.

Slavej, slavej, slavej Mariju (2 r)
Te ceļās vātra, ka kliņts sauc vaidēt,
Meitine nūsastuoj, grib breinuma gaideit.

Slavej, slavej, slavej Mariju (2 r)
I skaistu Jaunovu īrauga kolnā,
Boltuos drēbēs, kai rudiņa solnā.

Slavej, slavej, slavej Mariju (2 r)
Meitine dīveigi rūcenis salīk,
Tod matās ceļūs Jaunovu slavej.

Slavej, slavej, slavej Mariju (2 r)
Meitinis lyugšona sirsneigi atskaņ,
Paleigu, žieleiga Jaunova, dūd maņ.

Slavej, slavej, slavej Mariju (2 r)
Marija meitini cīneigi svietej,
Dabasu līksmeibu baudeit tai vielej.

Slavej, slavej, slavej Mariju (2 r)
Ka grāka ījemta Mameņa myusu,
Esi par muoti deļ ļaužu vysu.

Slavej, slavej, slavej Mariju (2 r)
Lyudzīs pi Dīva par katuoļu saimi,
Paleidz mums īmontuot dabasu laimi.

Slavej, slavej, slavej Mariju (2 r)
Ka mes tī myužeigi reizē ar tevi
Visaugstuokam Dīvam dzīduotu slavi.
Slavej, slavej, slavej Mariju (2 r)
(no klades)
(Vabole 2013)
02-T11-V6-Db2
O! Sirds Marijis cīneiga.
Dīva muotei pīdareiga,
Sirds vysu sūdu olūts ir(a):
Un duorgumu naizrunuotu,
Tu Jezu esi leidzeiba.
Dagūša Dīva mīleiba.
Naizsmalta jiurys lobuma.
Žielesteibys un gorduma.
Tai cīš daudz Tu mīļuoji.
Kod vin vuorgūs pasorguoji.
Tiuleņ esi nūskumuse.
Nu žāluma mums mīleiga.
Leidz kai muote prīcuodamuos,
Myusu laimis grybādama,
Slauki osorys, nu vuorgu,
Un prīkš ļaužu globoj borgu,
O! Sirds myusu pesteišonys,
Deļ padzeivuošonys,
Vysleluokuos mīleibys,
Nu vysu ļaužu gūdeibys,
Deļ tuo šudiņ sirdi munu,
Jau sabarstu nu žāluma,
Uperieju Tev zemeigi,
Lyugdams: pījem jū mīleigi,
Lai vīneibā ar kolpu tovu,
Es ar vysu sirdi sovu,
Tevi mīļoju un gūdynoju,
Un vysod eisti kolpoju,
Tu O! Sirds vysu gudruokuo,
Styga Dīva vysutaisnuoko
Pavyci, ka es labi dzeivuotu,
Dīva bausleibys globuotu. O! Vysa sirds skaistuma,
Dīva un svātūs jaukuma.
Dūd, ka sev nardzātu,
Pasauli smuodēt varātu.
Īstyprynoj mani īkš mīru,
Vysu labi dareit ar prīku,
Un īkš nalaimis byušonu.
Dīvam atdūt pateikšonu.
O! Sirds Marijis laimeiga,
Myusu nuocieja vīneiga,
Munu pruotu apskaidrynoj,
Dīva mīleibu pavairoj.
Lai puor vysu dzeivi sovu,
Vīneibā ar sirdi Tovu,
Dīvu munu es mīļoju,
Un myužeigi gūdynoju.
Amen.
(Lendži 2013)
02-T11-V6-Db1
Kas gryb Jaunovai Marijai dīnēt
Un tai Jū mīļuot, vysod Jū cīneit,
Lai sveicynoj Juos dīnā,
Koronkys puotorus lai skait`, kas zyna.
Tū dorbu Jei poša teikdama,
Vīnam kolpam sovam tai saceidama,
Runuoja, kas tai dareitu,
Lāsku nu Juos Dāla sev aizpeļneitu.
Tū izdzierda Bernadeņš cīneigs,
Mīļuotuos muotis Dīva gon breineigs.
Pret obrozu Vinis guoja,
Koronkys puotorus vys napuorstuoja.
Tai juos sirds Mariju cerēja,
Leidz kai dadzyn daga, kod pīminēja.
Sovai tjotkai tai runuoja,
Jumprovu Mariju tai sludynuoja.
Pazeistu es Jumprovu Viņu
Par kotru godnuoka nava zynoma.
Ni es īdzert navarātu,
Kurā dīnā vinis neapraudzeitu.
Pirmais tys, kas tū īstateja,
Koronkys puotorus tai pasaceja.
Sešdesmit un treis lyugšonys
Juoskaita Marijai iz pateikšonu.
Aiz tuo, ka tik godu Marijai,
Dzeivuodama šymā pasaulī beja.
Namozu prīcu redzēja,
Bet nūskumšonu lelu turēja.
Caur tuos prīcys un nūskumšonys
Lyudzam vysus grākus myus atlaisšonys.
O, Marija, tu žieleiga,
Muote myusu Jezus Krystus mīleiga.
Pyrmuo nūskumšona Marijai,
Kod Svāts Juoņs atguoja uz Betaneju,
Saceidams: "O, tjotka muna,
Nūskumeiga daīt Tev šudiņ runa.”
Jau Tovs dāls, o, muns bruoļs, muoceituojs,
Jezus Krystus mīleigs ir myus` peisteituojs.
Nūtvarts, sasīts nu ļaužu sovu
Es ar acim munam tū pasorguoju.”
Vede iz muižu, kur vieširnīki,
Īcierta tur viņam brīsmeigu pliki.
Kas jau zyna, vai dzeivs ir(a),
Tur Jū kola oklu un nalīk mīra.
Īsim dreižuok, nasakavēsim,
Moža Jezu dzeivu vēļ īraudzēsim.
Kod jam paleigu dūdami,
Naatsasāsdami i kluotu byudami.
Ūtruo nūskumšona Marijai,
Pīktdīņ agri beja pasavieršona
Iz sova dāla sasīta,
Ar mansārgim koklā cīš apkausteita.
Gribēja kluot pi viņa daīt,
Bet nū žāluma naspēja paīt,
Tik ar bolsu aizaklīdze
Leidz, kai grybādama tur nūmiert leidza.
Ak, muns dāls, esi tu prīca muna,
Pylna sirds man tyka lela ryugtuma.
Kad sasītu, nūkomuotu
Tevi radzu tagad cīš nūvolkuotu.
Trešū suopi Marija cīte,
Kod Jezu ar reikstem cīš nūšausteja.
Ar ierkškeižim sabadēja,
Golvu un tad viņai jū paruodeja.
Catūrtuo sirdssuope tyka,
Kod pret mīstu dālu sovu satyka.
Krystu leidzi nest grybēja,
Bet jau nu suopis staiguot naspēja,
Pīktuo suope Marijai beja,
Kod pi krysta Dālu Juos cīš pīsyta.
Jei iz sova Dāla plyka,
Apsagdama viņam drēbi izlyka.
Taids žālums juos sirdi puordyure,
Kod Jezus pi krysta kūka nūmyra.
Saule gaismys naruodēja
Un par treis stuņdis tymsums viņ beja.
Radeituoja gauži rauduoja
Un tuopec nadeve spūdruma sova.
Zeme vysa aiztreiseja,
Kod lelu žālumu tūlaik turēja.
Septeituo sirdssuope beja,
Kod jau nūmyrušu dālu Marija,
Rūkuos sovuos vuorteidama,
Klīdze, ar osorom Jū laisteidama.
Tī septeni puotori daīt,
Jo septenis reizis gribēja izlīt
Par mums Jezus aš(i)ni svātū,
Kod pasauļs dabasu prīcu turātu.
Lēja asni, kod apgraizēja,
Kod Jis Tāvu lyudze, kod Jū šausteja.
Kod ierkškeižu krūni lyka,
Kod jam daudz apsmīkļa tur pīcīst tyka.
Kod Jū pi krysta pīkoldami
Un rūkys un kuojis caurpuorsyzdami,
Mūceja tī beņdis, žydi,
Kod viņam puordyure suonu ar zīdu.
Bet nu prīcys septenis beja,
Kotrys īraudzēja Svātuo Mariju.
Kod eņgeļs Jū sveicynuoja,
Kod iz svātu Iļžu jei nūstaiguoja.
Kod Dīva Dālu dzymdynuoja,
Kod kieneni Dālu Juos gūdynuoja.
Kod bazneica atroduse
Jezu sovu beja un pazynuse.
Kad Juos dāls nu mirūņu cēlēs,
Uzvariejss spāku brīsmeiguos eļnis,
Kod pi Dīva poša tyka,
Iz debesim jimta, krūni dabuoja.
Kas tod tūs puotorus skaiteitu,
Lāsku nu Juos dāla sev aizpeļņeitu,
Kuo viņ’ praseis, vysa dabuos,
Juo deļ sovys muotis Jezus jam vys` dūd.
Jau tod mes, bruoleiši un muosys
Jaunovys Marijis teiktu syrds vysod.
Viņa jauka un prīceiga,
Nu juos mums griecinīkim daudzi paleiga.
Jau tod Tevi, Jumprova teira,
Zynom, teicam vysi, cik myusu ir(a).
Vysu sevi pošu atdūdami,
Tavys lāskys dabout cīš grybādami. Āmen.
(Lendži 2013)
Latgaliešu folklora. 2005 ©
Visus jautājumus un ierosinājumus sūtiet uz webmaster@ru.lv